चितवन । सिमलताल बस दुर्घटनाको अध्ययन गर्न बनेको कार्यदलले चितवन आएर घटनास्थलको निरीक्षण गर्नुको साथै सरोकारवालाहरुको सुझाव लिएको छ ।
सिमलतालको पहिरो र दुर्घटना भएको स्थानको स्थलगत निरीक्षण पश्चात जिल्ला प्रशासन कार्यालय चितवनको सभाहलमा अन्तरक्रिया गरिएको थियो ।
गृहमन्त्री रमेश लेखकले सिमलताल दुर्घटनाको अध्ययन गर्न गृह मन्त्रालयका सहसचिव छवि रिजालको नेतृत्वमा छ सदस्यिय कार्यदल गठन गरेका थिए । कार्यदलले घटना हुनुको कारण र आगामी दिनमा त्यस्ता घटना हुन नदिन अपनाउनुपर्ने उपायसम्बन्धमा सुझाव संकलन गर्नुका साथै बसमा सवार यात्रुका परिवारलाई राहत उपलब्ध गराउने सन्दर्भमा पनि अध्ययन गर्नेछ ।
गत असार २८ गते सिमलतालमा खसेको लेदोसहितको पहिरोले दुई वटा बसलाई सोहोरेर त्रिशूली नदीमा बगाएको थियो । दुई बससहित ६२ यात्रु बेपत्ता भएकामा हालसम्म १८ जना यात्रुको शव फेला परेको छ ।
