भरतपुर, साउन २१–
राष्ट्रिय स्वतन्त्र पार्टी (रास्वपा) भरतपुर महानगर समितिले नारायणी पुलबाट बढ्दै गइरहेका आत्महत्याका घटनाप्रति गम्भीर चासो व्यक्त गर्दै कानून, न्याय तथा संसदीय मामिला मन्त्री एवं चितवन क्षेत्र नम्बर–३ की प्रतिनिधिसभा सदस्य सोबिता गौतमलाई ध्यानाकर्षण पत्र बुझाएको छ।
समितिले नारायणी पुलमा भइरहेका दुःखद घटनाले जनमानसमा त्रास र चिन्ता बढाएको उल्लेख गर्दै मानव जीवनको सुरक्षालाई सर्वोच्च प्राथमिकतामा राखी आवश्यक बजेट विनियोजन तथा प्रभावकारी सुरक्षा व्यवस्थाका लागि तत्काल पहल गर्न आग्रह गरेको हो।
ध्यानाकर्षण पत्रमा पुललाई सुरक्षित बनाउन सेफ्टी ब्यारियर (तारजाली) जडान, उच्चस्तरीय सीसीटीभी क्यामेरा स्थापना, २४सै घण्टा सुरक्षा निगरानी, आपत्कालीन उद्धार टोलीको व्यवस्था, मनोसामाजिक परामर्श सेवा सञ्चालन, चेतनामूलक सूचना बोर्ड राख्ने तथा दीर्घकालीन सुरक्षा कार्ययोजना लागू गर्नुपर्ने माग गरिएको छ।
रास्वपाले आत्महत्या रोकथामका लागि केवल भौतिक पूर्वाधार मात्र नभई मानसिक स्वास्थ्यसम्बन्धी परामर्श, जनचेतना अभिवृद्धि र सम्बन्धित निकायबीच प्रभावकारी समन्वय आवश्यक रहेको उल्लेख गरेको छ। यस्ता उपाय प्रभावकारी रूपमा कार्यान्वयन गर्न सके धेरै अमूल्य मानव जीवन जोगाउन सकिने विश्वास पनि समितिले व्यक्त गरेको छ।
ध्यानाकर्षण पत्रमार्फत मानव जीवनको रक्षा गर्नु राज्यको मौलिक दायित्व भएको स्मरण गराउँदै नारायणी पुललाई सुरक्षित सार्वजनिक संरचनाका रूपमा विकास गर्न संघीय सरकार, सम्बन्धित मन्त्रालय तथा सुरक्षा निकायले प्राथमिकताका साथ आवश्यक कदम चाल्नुपर्नेमा जोड दिइएको छ।
रास्वपा भरतपुर महानगर समितिले यस विषयलाई उच्च प्राथमिकतामा राखी सम्बन्धित निकायमा आवश्यक समन्वय र पहल गरिदिन मन्त्री सोबिता गौतमसमक्ष अनुरोध गरेको जनाएको छ।
