बढ्दै गइरहेको महँगी र बिग्रँदो आर्थिक अवस्थालाई लिएर इरानमा यतिबेला तीन वर्षयताकै सबैभन्दा ठुलो प्रदर्शन भइरहेको छ । बीबीसी अरबी सेवाका अनुसार विरोध प्रदर्शनको पाँचौँ दिन बिहीबार इरानका विभिन्न सहरहरूमा कम्तीमा ७ जनाको मृत्यु भएको छ ।
प्रदर्शनकारीहरूले इरानका सर्वोच्च नेताको शासन अन्त्यको माग गरेका छन् भने अरूले राजतन्त्र फिर्तीको माग गरेका थिए । बिहीबार सामाजिक सञ्जालमा पोस्ट गरिएका भिडियोहरूमा प्रदर्शनकारी र सुरक्षा बलबिचको झडपका क्रममा सवारी साधनहरूमा आगजनी गरिएको देखाइएको छ ।
दर्शनकारीहरूले सुरक्षा बलमाथि ढुङ्गा प्रहार गरेका दृश्यहरू देख्न सकिन्छ । प्रहरीले प्रदर्शनकारीमाथि गोला बारुद र अश्रुग्यास फ्याँकेका छन् ।
दक्षिण पश्चिमी इरानी सहर लोरेस्तानमा प्रदर्शनकारी र सुरक्षा बलबिचको झडपमा तीन जनाको मृत्यु भएको इरानको सरकारी समाचार एजेन्सी फार्स र मानव अधिकार संगठन हेङ्गावले बताएका छन् । देशको पश्चिमी भागमा रहेको अज्नामा तीन जना र कुहदश्तमा एक जनाको मृत्यु भएको फार्सले बताएको छ । न्युज एजेन्सी नेपाल
