नवलपुर । नवलपुरको नारायणी नदीमा डुबेर एक जना पुरुष वेपत्ता भएका छन् ।
जिल्ला प्रहरी कार्यालय नवलपुरका अनुसार कावासोती १५ प्रजेटघाट स्थित नारायणी नदीमा माछा मार्ने क्रममा कावासोती १५ निवासी ५९ बर्षीय खुलचन माझी वेपत्ता भएका हुन् । उनी आज दिउँसो साढे २ बजेबाट वेपत्ता भएको र अझै नभेटिएको जिल्ला प्रहरी कार्यालय नवलपुरबा प्रहरी नायव उपरीक्षक वेदबहादुर पौडेलले बताए ।
एकै परिवारका ३ जना श्रीमान्, श्रीमती र छोरा भएर जाल हानी माछा मार्ने क्रममा अचानक डुंङ्गा पल्टन गरी माझी वेपत्ता भएका हुन् । उनकी श्रीमती र छोरा भने डुङ्गा समाएर बाच्न सफल भएको प्रहरीले जनाएको छ ।
नारायणी नदी किनारमा बस्दै आएका नवलपुरका बोटे, माझी, मुसहर समुदायका अधिकांश परिवार अझै पनि नारायणी नदीमा माछा मारेर जीविकोपार्जन गर्दै आइरहेका छन् ।
नारायणी नदीमा पानीको बहाब बढेको कारण पनि खोजी कार्यमा समस्या भएको प्रहरीले जनाएको छ ।
