नेपाली कांग्रेस चितवनले आगामि फागुन २१ गते हुने प्रतिनिधिसभा निर्वाचनका लागि उम्मेदवार हुन चाहनेहरुको सिफारिस प्रक्रिया अघि बढाएको छ ।
जिल्लाका तीन वटै क्षेत्रीय समिति मार्फत उम्मेदवार बन्न चाहनेहरुको सूची संकलन गर्न थालेको हो । मंसिर २५ गते भित्रमा जिल्ला समितिले केन्द्रमा उम्मेदवार हुन चाहनेहरुको सूची पठाउनु पर्नेछ । अहिले सोही अनुसार तीन वटै क्षेत्रीय समितिहरुलाई उम्मेदवार हुन चाहनेको नाम पठाउन निर्देशन दिइएको नेपाली कांग्रेस चितवनका सचिव ध्रुव पोखरेलले जानकारी दिए । ‘नाम पठाउनका लागि प्रक्रिया अघि बढि सकेको छ, अब केही दिन भित्रमा क्षेत्रीय समितिले नाम पठाएपछि हामी त्यही नाम केन्द्रलाई सिफारिस गर्नेर्छौ’–सचिव पोखरेलले भने ।
सचिव ध्रुव पोखरेलका अनुसार क्षेत्रीय समितिहरुले प्रत्यक्षतर्फ एक महिलासहित ३ जना, समानुपातिकतर्फ १ महिलासहित २ जना र राष्ट्रिय सभातर्फ प्रत्येक क्षेत्रबाट दुई–दुई जनाको नाम पठाउनु पर्नेहुन्छ । कांग्रेसले एकपटक समानुपातिकको सूचीमा परेकालाई यसपटक नराख्ने निर्णय गरेकाले सोही अनुसार क्षेत्रीय समितिहरुले नाम सिफारिस गर्नेछ । प्रतिनिधिसभा तर्फ चितवनमा ३ वटा निर्वाचन क्षेत्र छन् । गत २०७९ सालमा भएको निर्वाचनमा क्षेत्र नं.१ र २ बाट राष्ट्रिय स्वतन्त्र पार्टी विजयी भएको थियो भने क्षेत्र नं.३ बाट राप्रपाले चुनाव जितेको थियो ।
गत भदौमा भएको जनेजी आन्दोलनबाट बनेको नयाँ सरकारले फागुन २१ गते निर्वाचनको मिति तोकेको छ । सोही अनुसार नेपाली कांग्रेसले उम्मेदवार हुन इच्छुकहरुको सूची संकलन थालेको हो । कांग्रेस आउँदो पुस अन्तिम साता महाधिवेशन गर्ने निर्णय समेत गरेकाले अहिले गाउँस्तरबाट महाधिवेशनको प्रक्रिया समेत अघि बढेको छ ।
