१९, भदौ, चितवन । प्रेस चौतारी चितवनले चितवनका महिला पत्रकारहरुलाई दर खुवाएको छ । क्रियाशील पत्रकारहरुको संगठन चौतारीले जिल्लामा काम गरिरहेका महिला पत्रकारहरुलाई हरितालिका तीजको अवसरमा दर खुवाउने कार्यक्रम बुधवार गरेको हो । दियालो फूडल्याण्ड क्षेत्रपुरमा गरिएको कार्यक्रममा पत्रकारहरुले तीजका विभिन्न भाकाहरुमा आफैंले गीत गाउँदै नाचगान गरेका थिए । सो कार्यक्रममा पत्रकार महासंघका केन्द्रीय सचिव सिर्जना अर्याल, न्यूनत्तम पारिश्रमिक निर्धारण समिति सदस्य शान्ता अधिकारी लगायत विभिन्न सञ्चारमाध्यममा काम गर्ने महिला पत्रकारहरुको सहभागीता रहेको थियो । प्रेस चौतारी नेपाल केन्द्रीय सदस्य तथा चितवन जिल्ला इन्चार्ज प्रतिमा सिलवालले महिला पत्रकारहरुलाई उत्साहजनक सहभागी बनाएर चौतारी चितवनले दर खुवाउने कार्यक्रम राखेकोमा धन्यवाद दिइन् । उनले फिल्डमा सधैं रिपोटिङ्ग गर्न खटिने पत्रकारहरुलाई सम्झेर कार्यक्रम राख्दा खुसी मिलेको बताइन् । सिर्जनशील र रचनात्मक तथा सामाजिक काम गर्न चौतारी चितवनले लिएको अग्रसरताबाट सराहनीय भएको उनको भनाई छ ।
