काठमाडौं, १९ भदौ। नेकपा (माओवादी केन्द्र)का अध्यक्ष पुष्पकमल दाहाल प्रचण्डले नेपाली कांग्रेस र नेकपा (एमाले) मिलेर देशलाई दुईदलीय शासनतर्फ धकेल्न खोजेको आरोप लगाएका छन् । सरकारले मुलुकलाई अधिनायकवादतिर लाने संकेत देखा परेको उनको टिप्पणी छ । पार्टीको अनुशासन आयोग, निर्वाचन आयोग र लेखा आयोगको संयुक्त बैठकमा बुधवार समापन मन्तव्य राख्दै पूर्वप्रधानमन्त्रीसमेत रहेका प्रचण्डले कांग्रेस–एमाले गठबन्धन बनाउनुको नियत सफा नभएको बताएका हुन् ।
‘अब जनताको हक–अधिकार खोसिने आशंका भएको छ । जनतामा आक्रोश पनि बढिरहेको छ । जनता सरकारका क्रियाकलाप, रवैयाप्रति असन्तुष्ट हुँदै गएको छ भनेर अध्यक्ष प्रचण्डले बैठकमा कुरा राख्नुभयो,’ बैठकपछि प्रवक्ता अग्नि सापकोटाले भने, ‘देशलाई जबरजस्ती दुईदलीय शासनतिर लैजान खोजिएको छ । अधिनायकवादतिर लाने संकेत देखा परेको छ । पश्चगमनतिर जान खोजेको छ । त्यसलाई रोक्नका लागि जनतालाई सुसूचित गर्नुपर्छ ।’
माओवादीले सरकारविरुद्ध सडकमा आन्दोलन गर्ने सम्मको तयारी गरेको छ ।
