बाढीको ११औँ दिनमा चमत्कारः नुवाकोटमा वृद्ध महिला र रसुवामा चिनियाँ नागरिक जीवितै उद्धार
काठमाडौं, भदौ २० – भोटेकोशी हुँदै त्रिशूली नदीमा आएको भीषण बाढीमा फसेकी नुवाकोटकी ६४ वर्षीया चन्द्रिका श्रेष्ठको ११ दिनपछि सकुशल उद्धार गरिएको छ । बाढी प्रभावित विदुर नगरपालिका–१०, वेत्रावतीस्थित आफ्नै घरको चौथो तलाबाट श्रेष्ठको आज अपराह्न उद्धार गरिएको हो । सशस्त्र प्रहरी बल, १९ नं गुल्मबाट बाढी प्रभावित क्षेत्रमा खटिएको सशस्त्र प्रहरी निरीक्षक सुमन विकको नेतृत्वको टोलीले श्रेष्ठको उद्धार गरेको हो । गुल्मका प्रमुख सशस्त्र प्रहरी नायव उपरीक्षक वीरेन्द्र राउतका अनुसार बाढी प्रभावित बस्तीमा घरभित्र रहेका सामग्री हटाउन तथा सहयोग गर्न पुगेको उद्धार टोलीले घरभित्रबाट महिलाको आवाज सुनेपछि तत्काल खोजी गरेको थियो । खोजीका क्रममा चन्द्रिका हिलोमा गाडिएको अवस्थामा फेला…
