चितवनमा भएका जम्मा दुर्घटनाको ६० प्रतिशतभन्दा बढी दुर्घटना मोटरसाइकल भएका छन् । ट्राफिक कार्यालय भरतपुरका अनुसार १०० दुर्घटनामध्ये ६६ वटा दुर्घटना त मोटरसाइकल नै हुने गरेका छन् ।
मोटरसाइकल बढी दुर्घटना हुनुमा तीव्र स्पीड, ट्राफिक नियमको पालना नहुनु, मादक पदार्थ सेवन गरी सवारीसाधन चलाउनुलगायतका कारण देखिन्छन् । चितवनका स्थानीय तहसँग दुर्घटना न्यूनीकरणका कार्यक्रम नै छैनन् । स्थानीय तहले दुर्घटना न्यूनीकरणको सम्पूर्ण जिम्मा ट्राफिक कार्यालयको हो जस्तो गर्छन्, ट्राफिक कार्यालयले सीमित स्रोतसाधनले कति गर्न सकिन्छ त्यति गरिरहेको बताउँछ ।
जिल्ला ट्राफिक प्रहरी कार्यालयका प्रमुख प्रहरी निरीक्षक अनिल थापाका अनुसार गत साउनदेखि कार्तिकसम्म ३३३ सवारी दुर्घटना भए । तीमध्ये दुई सय एक त मोटरसाइकलमात्रै दुर्घटना भएका छन् । यस्तै जिप÷कार ३४, शारीरिक शक्तिले चल्ने ३०, ट्रक/ट्याङ्कर २४, बस १५, टेम्पो १४ रहेका छन् । यस्तै टिप्पर दुई, माइक्रोबस पाँच, ट्रयाक्टर चार र अन्य सवारीसाधन चार छन् ।
तथ्याङ्कअनुसार दुर्घटना भएका सवारीमध्ये अत्यधिक मोटरसाइकल भएका छन् । नियमनमा कडाइ भेटिँदैन, पहिलेजसरी मापसे जाँच पनि देखिँदैन, जसका कारण दुर्घटना बढिरहेको छ । दुर्घटना न्यूनीकरणमा पालिकाको चासो पनि कम छ, जसका कारण धेरै युवाले अकालमा ज्यान गुमाइरहेका छन् ।
चितवनमा भएका दुर्घटनामा गत साउनदेखि कात्तिकसम्म २९ जनाले ज्यान गुमाए । यसमध्ये २१ पुरूष, छ जना महिला र बालबालिका दुई जना रहेका छन् । ट्राफिक प्रमुख प्रहरी निरीक्षक अनिल थापाका अनुसार चालू आर्थिक वर्षको साउनदेखि कात्तिक मसान्तसम्ममा भएका दुई सय २४ दुर्घटनामा उनीहरुको ज्यान गएको हो । यस्तै, ती दुर्घटनामा परी चार सय ५६ जना घाइते भएका छन् । यसरी दुर्घटनामा पर्नेमा सबैभन्दा बढी मोटरसाइकल छन् ।
गत आवको सोही अवधिमा दुई सय पाँचवटा सवारी दुर्घटना भएको थियो । गत वर्षको तुलनामा यसवर्ष दुर्घटना धेरै भए पनि मानवीय क्षति भने कम भएको छ । गत वर्ष सोही अवधिमा भएका दुर्घटनामा ४६ जनाको मृत्यु भएको थियो भने चार सय १४ जना घाइते भएका थिए ।
दुर्घटना न्यूनीकरणका लागि जिल्लामा छड्के जाँच, जनचेतना जगाउने कार्यक्रम गरिरहेको थापाले बताए । फराकिला सडकमा तीव्र गतिमा सवारी चलाउँदा र मादक पदार्थ सेवन गरेर सवारी चलाउँदा अहिले दुर्घटना बढेको उनले बताए । सडकअनुसार सवारी चाप बढी हुनु र ट्राफिक नियमको पालना नगर्नुले पनि दुर्घटना बढेको उनले जानकारी दिए ।
